Musico de Tigbauan

Bulahan Ka, Tigbauan

Tigbauan, banwa ka nga dungganon

Puluy-an sa higad sang baybayon

Ang imo kasaysayan gindihon

Sa sulod sang madamong dinag-on.

Tigbauan, matahum ka nga hiyas,

Napugtak sa sidsid sang Visayas,

Dutang gintakda sang Manluluwas

Diin and paganismo napanas.

Kay sa hamili nga dughan nimo,

Diri ginpanggas ang Kristiyanismo

Relihiyon nga nangin regalo

Sang Hesuita nga misyonero.

Ang mga anak mo nagkilala

Sa Santa Iglesia Catolica

Nga sa imo kadaygan gindala

Sadtong Prayle gikan sa Espanya.

Ang Dios nagapakamaayo

Kag pirme naga-ubay sa imo

Kay ginbaton mo ang Krus ni Kristo

Nga kaluwasan sang mga tawo.

Sanctuario ka sang mga deboto

Sang mahal nga Sr. Santo Nino

Nga ginkabig nga Patron sang pueblo

Bangud sang Iya mga milagro.

Tigbauan, bulahan ka nga banwa,

Kay ang Imo mahal nga parokya

May simbahan nga human sa gugma

Templo sang malig-on nga pag-isa.

Damgong nagmatuod ang katulad

Sang simbahan nga sadto ginpasad

Ginpatahum suno sa ginsaad

Sa Imo, Tigbauan, ginahalad.

Lyrics by: Ma. Luisa Tejero Torrento

Music by: Romulo J. Pangan

Sung (for the first time) by: The St. Cecilla’s Choir

Tigbauan, Iloilo

3 February 1997

Himno Sang Tigbauan

Bilidhon ka nga hiyas Tigbauan.
Malapad nga baybay ang katipan
Bahandi nga labing tinipigan,
Sang amun mga katigulangan

Sa bugana mong patag Tigbauan,
Ginpanggas sang amon ginikanan
Mga handum sang katibawasan
Kag mga damgo sang kauswagan

Tigbauan pinalabi sang Diwa
Duna ikaw nga mahamungaya
Isa ka suba ang ga alila
Sa silak sang adlaw nga pinalangga

Tigbauan matinggas ang mga uhay
Ang tuba mo dug-os ang kaangay
Marimis ang mga isda sa baybay
Kag may ma anyag nga mga lin-ay

Sa imo Tigbauan may paglaum
Madamo ang manggad nga likum
Gintigana sang mga matutom
Ang mapisan indi gid magutom

Sa simbahan mo kag mga dalan
Nakasulat sa dugo kag luha
Sang imo nga mga kaanakan
Ang imo kasaysayan Tigbauan

Tigbauan ikaw ang paraiso
Nga ginapuy-an sang mga taho
Nga simpatiko kag karinyoso
Kag sa Diyos himpit ang pagtuo

Tigbauan matahum kag matawhay
Pugad sang kahirap kag kalipay
Mabuhay ka amon banwang hilway
Mabuhay ka Tigbauan mabuhay!
Mabuhay ka amon banwang hilway
Mabuhay ka Tigbauan mabuhay!